Lou martegue vai s’endeveni quatre jour durant la grando capitalo dis pais de lengo d’o. De fèt, lou Felibrige, que dou daut de si cènt dinquanto an d’eisistènci, countùnio fidelamen sa missioun de mantenement e d’enançamen, a chausi aquest an la Veniso prouvençalo -coume l’apelavon antan- pèr ié teni soun Coungrès, di de la Santo-Estello. Un coungrès qu’aura coume li precedènt pèr voucacioun de recampa touti aquéli de la necessita que i’a pèr un pople de counserva soun identita pèr mies s’enracina dins soun presènt à travès aquéli valour proumiero que soun la lengo e la culturo. Mai u coungrès qu’aura tambèn pèr voucacioun de moustra à bèus ieu vesènt que de counserva sa lengo aco emplico nulamen lou replegadis mai à l’enverso la recouneissènço de l’autre à travès si semblanço emai si dissemblanço e qu’aqui tout lou mounde a ’n role à jouga quand vesèn coume se traduson li menaço d’entegrisme dins nosto soucieta. Es bèn aquelo pensado en mouvament - d’un mouvamen que vai de l’idioumatique à l’universau- que sara au cèntre d’aquéli fèsto à travès li noumbrousi manifestacioun que nous soun ouferto pèr la Capouliero e la vilo dou Martegue que saludan de tout cor emé li Martigau e li Martegalo en ié disènt noste gramaci pèr soun acuiènço que n’aura rèn, cresès-me, d’un faus-semblant !

Pèire Fabre

Capoulié dou Félibrige